Хайаҕыт эрэ санаатыттан
Хайаҕыт эрэ санаата
Хараҥатыттан, сырдыгыттан
Хапсыһаргыт баһаамнаата.
Хайаҕыт эрэ таһымыттан
Хайаҕыт эрэ таһыма
Үрдүгүттэн, намыhаҕыттан
Өйдөспөккүт үксээн барда.
Хайаҕыт эрэ сыһыаныттан
Хайаҕыт эрэ сыһыана
Тымныытыттан, сымнаҕаһыттан
Тыыҥҥыт хаайтаран барбыта…
Ити кэмнэргэ оччотугар
Иккиттэн бииргит, арааһа,
Ордугурҕаспаккыт туһугар
Ордуга буолуо ырааҕа.
Арахсыы — абырал көрүҥэ,
Ардыгар кини туһалаах.
Хас биирбит бу сиргэ көҥүлэ
Хайаан да наада быһыылаах.
Оччоҕо эрэ ыраас дьону
Киртитэ сатыахпыт суоҕа,
Оччоҕо эрэ ыраах дьолу
Ким эрэ, баҕар, булуоҕа.
Кэскил туһугар охсуһарга
Кэмнээх үһүө киһи сыала,
Арай олоҕу тупсарарга
Адьас кыра кини кыаҕа.
Киһи бэйэтин күүһүн-кыаҕын
Билбэт хаһан да дьиҥнээхтик,
Ол иһин барыга сыһыанын
Олохтуу сатыыр тэҥнээхтик.