Ыһыах ыһар ыраах дойду
Ыллам-дьэллэм киһитин
Ырыакайа-тойукайа
Ылбаҕайын эбитин:
Сүр кэрэҕин хоһуйбутун
Сөбүлээҥҥин иһиттиҥ,
Сүрэҕийиҥ долгуйбутун
Сөҕөн эрэ кэбистиҥ.
Хатыҥ чараҥ Толоонугар
Хантан маннык кыыс кэлэн
Көрдөөх ырыа долгунугар
Көтөхтөрөн хаамтыҥ эн?
Оһуор күөххэ ойо-тэйэ
Оонньуур дойду ыччатын
Оһуокайа-эһиэкэйэ
Умсулҕанын баҕаһын!
Уолан бэрдэ улам иэйэ
Онно сэргэ хаампытын
Оҕо бэйэҥ имиҥ кэйэ
Улахаҥҥа уурбатыҥ.
Хатыҥ чараҥ Толоонугар
Хантан маннык кыыс кэлэн
Көрдөөх ырыа долгунугар
Көтөхтөрөн хаамтыҥ эн?
Симэх-ойуу сибэккигэ
Сиэлэр дойду оҕотун
Сэһэнигэ-тэппэнигэ
Сиэдэрэйэ олуһун!
Сиэр-туом ордук ситэритэ,
Сэрэйэҕин ол тугун —
Сити курдук силигитэ
Ситиэ эмиэ олоҕуҥ.
Хатыҥ чараҥ Толоонугар
Хантан маннык кыыс кэлэн
Көрдөөх ырыа долгунугар
Көтөхтөрөн хаамтыҥ эн?
