Хоһооммун суруйан бараммын
Хоппобор суулааммын укпутум,
Эһиилгэ диэритин ыламмын
Иккистээн оҥоруох буолбутум.
Кумааҕы бөҕөлөөх хоппобун
Кууһаммын таһырдьа таһаартым,
Өр уура сытарга хоспоҕу
Үтүөкэн сиринэн быһаартым.
Хайгыыр ол хоспоҕум эргэтин
Харахтаах барыта көрөрө,
Үрдүгэр хоп-хойуу эрбэһин
Үүнэрэ ыраахтан көҕөрө.
Кинини онтон дуу ардыгар
Хоп-хойуу лөглөйбүт баттахтаах
Хоту сир иччитин баһыгар
Холуйа көрөбүн бадахтаах.
Хоһооммун ол иһин буолуоҕа
Хоспохпор үөрүүнэн илдьэбин.
Сир сыта, сир тыына, сир уоҕа
Сиик буолан киниэхэ иҥиэхтин!