Хайдах курдук кэрэҕин!
Харахтарым этэрин
Судургута бэрдин диэн
Соһуйума, сэгэриэм!
Кэпсэтиһэ олорон,
Кэрэлэртэн ордорон
Өрдөөҕүттэн ыла мин
Өйдөөн көөртүм эйигин,
Үрүҥ туллук кэриэтэ
Үчүгэйкээн бэйэҕин,
Үчүгэйкээн бэйэҕин.
Көрсөн эрэ таптаһыы,
Күнүн-түүнүн ахтыһыы
Соро-муҥа бэрдин диэн
Соһуйума, сэгэриэм!
Сиэрдээх-туомнаах тапталы
Сэрэйбэккэ даҕаны
Таарымтырбыт курдук мин
Таптаабытым эйигин,
Симэх отум кэриэтэ
Сиэдэрэйкээн бэйэҕин,
Сиэдэрэйкээн бэйэҕин.
Көрө түһээт сөхпүтүҥ,
Күлүм гынаат сүппүтүҥ
Соторута бэрдин диэн
Соһуйума, сэгэриэм!
Хараҕынан таптаһыы —
Хардыы аайы баар быһыы,
Аара суолгар туран мин
Атаарбытым эйигин,
Көҥүл чыычаах кэриэтэ
Көтөр-дайар бэйэҕин,
Көтөр-дайар бэйэҕин.