Элик, туртас, чубуку
Эбэтэр кини Мэкчэки
Кэрэтинэн булчуту
Аралдьытан куотар мэлдьи.
Булчут саатын көтөҕөн
Кыҥыах курдук буолан иһэн,
Көрбөтөҕүн дуу көрөн
Көхсүн этитэр сэрэнэн.
Уустар муостан чочуйан
Оҥорбут курдук кыыллара
Атахтара чуочайа
Тоҥуунан ойон кыыратар.
Элик, туртас, чубуку
Эбэтэр кини Мэкчэки
Ойуолуура, доҕоччук,
Олус даҕаны чэпчэки!
Ыарҕалары үрдүнэн
Көтөн иһэр көстүү буолан,
Бэрт кыраттан да үргэн
Мэлис гынар кини куотан.
Кэлин дьон бу кэрэни
Кэпсээҥҥэ холбоон саныыллар,
Сытыы-хотуу киһини
Элик бэрдэ диэн ааттыыллар.