Кырдьаҕас, тыатааҕы, эһэкээн
Истиҥ даҕаны тыллар!
Ким да үөрүөх этэ биһирээн
Итинник ааты ыллар.
Бары кыыллартан кини эрэ
Туох баара туспа ааттаах.
Ыраах кэмнэргэ хаһан эрэ
Ытык буолбут быһыылаах.
Кини тириитэ — арбаҕаһа,
Кини этэ — харата,
Аһыыта, тииһэ — анаҕаһа,
Иһэ-үөһэ — кыймата.
Кини хараҕа — кылатара,
Кини баһа — харынньыта —
Оттон уҥуоҕа — кырамтата
Уонна хайа — баппаҕайа!
Кини киирэр, тымныы түһээтин,
Кистээн хаспыт арҕаҕар,
Ону дэҥҥэ таба үктээбит
Олус баартаах аатырар.
Эһэни бултаабыт булгуччу
Сэбээриҥнээн аһатар,
Малааһын сэһэнэ олоччу
Мааны кыылга ананар.