Тыатааҕы, оҕонньор
Тыаһа суох үктэнэр,
Кумахха онньоҕор
Суолларын түһэрэр.
Арыт субу иннигэр
Ааспыт буолар кини,
Ол аата биллэрэр
Эйиэхэ эйэни.
Эһэни эн адьас
Кыыһырдар буолума,
Барыаҕа Кырдьаҕас
Бэйэтин суолунан.
Арыт сүр үрдүктүк
Айанныыр аартыгар,
Атын кыыл сөҕөрдүк
Аар маһы бааһырдар.
Ол оннук Эһэкээн
Ыырданар сиригэр,
Манна мин баарбын диэн
Ыалларын сэрэтэр.
Ол иһин даҕаны
Былыргы сахаҕа
Оҕонньор, тыатааҕы
Ытык кыыл буоллаҕа.
Аатын да бэл диэтэр
Аргыыйдык ааттыыллар,
Киһи дуу кэриэтэ
Кинини саныыллар.
Эһэкээм, эйиэхэ
Эйэҥ иһин махтал!
Баһаалыста, миэхэ
Баппаҕайгын аҕал!