Хоһоон алыптаах сарсыардата
Бүгүн, кырыалаах кыһыммыт биир күнүгэр, библиотекабыт ааҕар саалата истиҥ иэйиилээх хоһоон бэлэхтээх олус күндү ыалдьыты көрүстэ. Ол курдук, Былатыан Ойуунускай аатынан Саха академическай тыйаатырын талааннаах артыыһа, үгүс кинигэни саҥардыбыт бибилэтиэкэбит көмүс куолаһа, Саха Өрөспүүбүлүкэтин үтүөлээх артыыһа Елизавета Федотовна Потапова ыалдьыттаата.
Сүүрбэттэн ордук сыл устата көрбөт дьон сахалыы уус-уран литэрэтиирэни ааҕалларыгар сүҥкэн кылааты киллэрбит күндү киһибит маанылаах куолаһын истэн, сэһэргэһэн астынныбыт. Хоһоон алыптаах чааһыгар уйдаран күннээҕи түбүктэн сынньанныбыт, бэл сайыҥҥы саймаархай салгын илгийэргэ дылы гынна.
Күндү ааҕааччылар, сахалыы уус-уран айымньылары, хомоҕой хоһооннору ааҕыҥ, сэргээҥ, истиҥ диэн ыҥырабыт!
Чичигинарова Ульяна
